8.The Spoils of War

  1. Jijak tanyong dum hukom bak gata Teuntang hareuta bak jalan Allah Harta rampasan ‘oh talo musoh Takheun nyoe sunggoh cit milek Allah Allah ngon rasui nyang po harta nyan Takwa keu Tuhan teuma tapeugah Beugot hubungan sabe droe gata Bek na meudawa taʻ‘at keu Allah Meunyo cit gata ureueng meuiman Taʻat keu Tuhan ngon rasui Allah
  2. Teuma nyang keubit ureueng meuiman Geuseubot Tuhan dijih yo leupah Watee jideungo geuseubot Tuhan Lam ate jih nyan teumakot leupah Watee geubaca dum ayat Tuhan Meutamah iman dijih keu Allah Tawakkai jok droe keudeh bak Tuhan
  3. Peubuet seumbahyang han tom jikeubah Nibak raseuki nyang ka Kamoe bri Seudeukah jibri lom ngon nafakah
  4. Nyoekeuh nyang mukmin nyang that sibeuna Pangkat that raya Neubri le Allah Neubri amponan dengon raseuki Nikmat han sakri cit ka Neukeubah
  5. Lagee yoh Neuyue uleh Po gata Tateubiet sigra keudeh talangkah Bek le di rumoh teubiet u lua Di rakan gata sang-sang geubantah Siteungoh mukmin sang hana seunang
  6. Geubantah yoh nyan bek tameulangkah Geubantah gata teuntang nyang beuna ‘Oh Iheueh trang nyata kon na meusalah Sang-sang geumaba keudeh bak mate Jikalon lahe teumakot leupah
  7. Watee Neujanji Tuhan ngon gata Saboh lam dua beu ek tapapah Beu ek talawan jih nyan le gata Teuma digata napsu nyang mudah Bek nyang le syaukat bek nyang teuga that Nyang laen meuhat napsu tapeugah Teuma di Tuhan laen Neukheundak Peubeuna nyang hak anco nyang salah Peubeuna nyang hak ngon ayat Tuhan Nyang kaphe yoh nyan anco dum bicah
  8. Nyang keubeunaran meunang peukuat Nyang bateue meuhat beu abeh sudah Bah that si kaphe hana jigalak Dijih cit nyang hak beunci jih leupah Dijih nyang galak jipeubuet deicha
  9. Teuma digata lakee bak Allah Watee uroe nyan tamohon pinta Bak Tuhan gata nyang Maha Murah Neubri bantuan Neutulong gata Teurimong sigra Neukheun le Allah Lon bri siribee droe malaikat Meuturot ligat teuka kaphilah
  10. Haba geumbira Neubri le Tuhan Mangat jeuet seunang ate bek sosah Ate gata dum mangat jeuet teunang Gata ka meunang Neubri le Allah Kon na beurangsoe bri keumeunangan Meulengkan Tuhan nyang Maha Murah Keubit cit Tuhan Maha Peurkasa Ngon Bijaksana Areh that leupah
  11. Watee nyan gata Neubri teungeut that Teupako siat hana le leulah Jeuet teuma gata ka aman ate Han le tapike keu hai nyang sosah Teuma di langet Neupeutron ujeuen Tamanoe bandum ngon taseumeurhah Hingga gleh gata gleh nibak dacha Cheitan meu daya hana le ilah Meuikat ate sabe chedara Saboh agama saboh kaphilah Teutap ngon gaki kong peundirian Hana le bimbang iman keu Allah
  12. Yoh nyan Neuwahi uleh Hadharat Bak malaikat laju geupeugah Lon sajan gata jinoe peukuat Ureueng nyan nyang that iman keu Allah Lon meung tiek geusuen lam ate kaphe Takoh beu mate dum kaphe jadah Tatak bak takue troh ucong jaroe Bandum taseudoe bek le takeubah
  13. Sabab awak nyan dilawan Tuhan Ngon rasui Tuhan dijih jibantah Beurangsoe lawan Tuhan ngon rasul Meugasui-gasui lam apui mirah Cit brat sileupah hukoman Tuhan
  14. Karasa dum nyan jinoekon dikah Sabab kakaphe dikah geuseksa Azeueb nuraka keu kaphe jadah
  15. Hai ureueng mukmin meunyo tameucang Ngon kaphe suwang got lam blang luah Bek sagai gata surot u likot
  16. Meunyo tasurot mureuka Allah Malinkan hilah tasie dalam prang Taeu peuluang tateugom bagah Get pih tameusie ubak pasukan Meunyo kon meunan raya that salah Mureuka Tuhan asoe nuraka Teumpat brok raya lam apui mirah
  17. Kon gata nyang poh mate awak nyan Nyang poh awak nyan cit keudroe Allah Tarhom ngon leumbeng pih kon le gata Allah Taʻala nyang rhom jih tiwaih Meukeusud Tuhan Neurhom awak nyan Mangat jeuet meunang kaom meutuah Kaom meuiman Neubri bulueng got Neudeungo that got bandum le Allah Lom pih Neuteupeue sigala rupa
  18. Jeuet meunang gata kaphe jeuet kalah Tuhan peuleumoh daya dum kaphe Hana daya le ka abeh hilah
  19. Meunyo gata dum lakee bantuan Ka troh bantuan Neubri le Allah Meunyo tapiyoh nyan leubeh that got Meu tawo bak sot kakeuh lom salah Kamoe pih Meuwoe meuhukom gata Han le meuguna ngonteuh le leupah Bahle le beu that taba angkatan Ureueng meuiman cit sajan Allah
  20. Hai ureueng mukmin taʻat keu Tuhan Ngon rasui Tuhan bek na meuubah Bek roh tapaleng padahai gata Tadeungo rata bandum peurintah
  21. Bek teuma gata lagee awak nyan Kamoe deungo nyan meunan jipeugah Padahai dijih hana jideungo Jipeuko-peuko mangat roh salah
  22. Makheuluk Allah nyang jeuheut laku Nyang tuloe bisu meuganchep babah Hana meuakai jih ngon jipike
  23. Adak meu Neubri keu jih le Allah Meunyo Neuteupeue jih got le Tuhan Neupeugot jih nyan jideungo bagah Teuma meu Neubri jih deuh jideungo Meuhat jipeuko cit han jiubah Meuhat jipaleng jijak ho laen Han roe jih meuchen deungo peurintah
  24. Wahe dum mukmin tapeubuet laju Suroh Tuhanku ngon rasui Allah ‘Oh geuhoi gata bak keubajikan Jeuet keuhidupan gata jroh leupah Seunang taudep lom beu tateupeue Gata Neupageue ate le Allah Antara ate ngon manusia Allah Taʻala Neupeugot pisah ‘Oh dudoe gata bandum meusapat U keue Hadharat nyang Maha Murah
  25. Beu na taingat ‘oh teuka bala Goh teuntee gata ek roh meusiblah Kon ureueng lalem mantong nyang keunong Bandumteuh keunong hana meuilah Lom beutateupeue hukoman Tuhan Han ek tatuban cit brat sileupah
  26. Beu taingat lom yoh gata nit that Leumoh seumangat di bumoe Allah Takot jisama gata le musoh Jiba plueng jioh gata jeuet sosah Neujok treuk teumpat gata le Tuhan Neubri bantuan lom le that leupah Neubri keu gata lom keumeunangan Lom Neubri yoh nyan raseuki mudah Mangat tachuko bandum keu Tuhan Ateuh nikman nyan Neubri le Allah
  27. Hai ureueng mukmin bek takhianat Tuhan Hadharat ngon rasul Allah Lom bek khianat amanah gata Nyang bandum gata tateupue sudah
  28. Lom beu tateupue arta ngon aneuk Teuh jeut meusireuk bak tabot langkah Jeut keu fiteunah sabab areuta Ngon aneuk gata pih hana ubah Teuma bak Tuhan pahla raya that Nyan nyang taharap Neubri le Allah
  29. Hai ureueng mukmin meunyo dum gata Tatem takwa keupada Allah Neubri keu gata jeut tapeubeda Nyang toh nyang beuna nyang toh nyang salah Lom tapeuteuboh lom salah gata Neuampon dacha gata le Allah Keubit cit Tuhan le that karonya Neuh akan hamba raya sileupah
  30. Watee si kaphe jimita daya Jimeudrop gata jimita hilah Jimeung poh gata jiuse gata Teubiet ulua jiparoh bagah Teuma awak nyan jimita daya Neubalah daya keu jih le Allah Tan laen daya nyang leubeh that got Cit meu Hadharat daya jroh leupah
  31. ‘Oh geubot keu jih dum ayat Kamoe Cit jikheun meunoe laju jipeugah Ka kamoe deungo meunyo h‘eut kamoe Saban lagee nyoe cit jeut meupeugah Cit kon peue laen nyoe bandum dongeng Kheun ureueng jameun masa nyang sudah
  32. Lom pih watee nyan jikheun ya Tuhan Meu keubenaran nyoe hana salah Meu bit atra nyoe asai nibak Droe Neuh bek le laloe kamoe Neubalah Neubri keu kamoe treuk ujeun batee Di langet teuntee keunoe Neuruwah Atawa Neubri azeub nyang peudeh Keu kamoe jach ureueng nyang salah
  33. Han roe Neuazeub jih nyan le Tuhan Meu gata sinan mantong Neukeubah Han roe Neuazeub jih meunyo mantong Nyang lakee ampon dacha bak Allah
  34. Pakri han teuma jih nyan Neuazeub Jijak tham umat bek seumah Allah Han jibri tamong Masjidil Haram Droejih pih meunan tulak peurintah Kon jak kuasa bak meusijid nyan Nyang hak atra nyan ureueng meutuah Soe nyang takwa wali di sinan Nyang hak atra nyan Neubri le Allah Teuma le that jih hana jiteupue
  35. Nyang na jiteupue meuyup-yup babah Jiyup-yup babah jiprok-prok jaroe © Seumbahyang jih nyan meunan keuh ulah Meunan keuh macam seumbahyang jih nyan Karasa jinoe azeub that di kah Sabab yoh dilee di kah kakaphe
  36. Keubit si kaphe buet jih that salah Jibri areuta nak jitham dum gop Bek geujak pubuet bak jalan Allah Bah jibri laju areuta jih nyan Meunyesai lheuh nyan hana peue peugah Lheuh nyan lom talo teuma dalam prang Dudoe jahannam teumpat geukeubah Bandum na kaphe keunan meusapat Uroe akhirat lam apui mirah
  37. Mangat le Tuhan Neupeungkleh nyang brok Bek sapat tumpok ngom nyang got ulah Nyang brok sabe brok jih Neupeutamon Dalam jahannam nuraka juah Bandum jih sinan Neuyue peusapat Awak nyan meuhat rugoe that leupah
  38. Takheun bak kaphe meunyo jipiyoh Bek hana teudoh jipubuet salah Nyan geupeuampon buet jih nyang ka-ka Meunyo jigisa nyan laen ulah Nyan hukom Tuhan cit ka dileekon Keu jih pih mantong Tuhan Neukeubah
  39. Taprang awak nyan sampoe ‘an aman Fiteunah pih han tan le jipeugah Agama teudong milek Hadharat Awak nyan meuhat jipiyoh payah Meu ka jipiyoh hana le meuprang Nyan teuma Tuhan Neukalon sudah Peue nyang jipubuet Tuhan Neukalon
  40. (Meunyo jipaleng pulang bak Allah Beu na tateupue Tuhan Po gata Sineujroh raja Po gata nyang sah JUZ 10) Sineujroh teumpat talakee tulong Nyang bri peulindong keu hamba Allah
  41. Lom beu tateupue harta rampasan Nyang tacok lam prang be tapeusiblah Tabagi limong nyang saboh bagi Tuhan ngon nabi milek takeubah Kawom keurabat ngon aneuk yatim Ngon ureueng gasien han sep napakah Ureueng meudagang pih na bahgian Meunyo na iman gata keu Allah Meunan pih keu peue nyang Kamoe peutron Bak uroe meuprang meucre meupisah Uroe meureumpok dua pasukan Teuma cit Tuhan kuasa leupah Ateuh barangpeue Tuhan kuasa
  42. Watee nyan gata bak saboh leumbah Bak ureueng nyang toe sinan tapiyoh Bak ureueng jioh musoh beurakah Sangkira gata tapeugot janji Jeut keu meuungki meubantah-bantah Tapi bak Tuhan cit ka meuteuntee Han jeut meusilee tamita ilah Mangat jeut meuri soe nyang binasa Soe leubeh teuga pih nak trang leupah Soe nyang ka mate soe nyang ka udep Watee nyan sabet hana meuilah Teuma cit Tuhan Neudeungo dumpeue Neuteupue dumpeue hana meusalah
  43. Yoh Neupeuleumah jih nyan bak gata Lam teungeut gata jih seunang leupah Adak meu le jih leumah bak gata Meuhat jeut lia ateteuh gogah Jeut treuk meubantah sabe droe gata Tapi Neujaga gata le Allah Neubri seulamat keu bandum gata Peue nyang lam dada Neuteupue leupah
  44. Yoh Neupeuleumah lom jih bak gata Nyang di keu mata teuh tangieng sudah Watee meureumpok jih deungon gata Leumah bak mata teuh jih nit leupah Di jih pih jieu nit awak gata Meunan bak mata jih Neupeuleumah Mangat di Tuhan Neumeung peunyata Han jeut meutuka ban nyang hʻeut Allah Teuma bak Tuhan meuwoe urusan Dum seukalian hana meuubah
  45. Hai ureueng mukmin meunyo meuteumee Gata ngon sitree ate beu tabah Beu teutap ate lom beu le that-that Ingat Hadharat seubot ngon babah Mudah-mudahan gata cit meunang
  46. Tataʻat Tuhan teuma that leupah Tataʻat rasul teuma pih meunan Sabab droeneuh nyan utosan Allah Bek tameubantah sabe keudroe-droe Gata jeut rugoe hana phaedah Nan gata nyang got pih gadoh keudroe Mey gata laloe meubantah-bantah Teuma tasaba le bandum gata Mangat jeut gata sajan ngon Allah Allah cit sajan ngon ureueng takwa
  47. Bek sagai gata teukabo meugah Bek lagee ureueng teubiet di gampong Teukabo that mbong ngon riya leupah Riya peuleumah bak manusia Jitham gop teuma bak jalan Allah Peue nyang jipubuet Tuhan Neuteupue Dumpeue Neuteupue ‘eleumee luah
  48. Yoh jipeuindah buet jih le chetan Jikheun hai rakan gata han kalah Han soe peutalo gata uroe nyoe Hana barangsoe nyang ek peutewah Lon rakan gata nyang bantu gata Tapi ‘oh teuka dua kaphilah Dua pasukan ‘oh ban meuhadap Jisurot ligat chetan seurakah Jikheun hana roh lon sajan gata Di lon ka nyata lonkalon ulah Nyang han deuh ka deuh lon kalon Teumakot that lon jinoe keu Allah Hukoman Tuhan meuleumpah that brat
  49. Munaphek meuhat laen jipeugah Yoh nyan munaphek jikheun peue jih nyan Tipee ka keunong bak jih jeut salah Ka keunong tipee jih le agama Jih saban teuma rakan jih peugah Rakan jih nyang na peunyaket ate Sa ngon jih pike hana meuubah Teuma barangsoe tawakai jok droe Bak Tuhan sidroe nyang Maha Murah Teuntee that Tuhan Maha Perkasa Ngon bijaksana areh that leupah
  50. Sangkira taeu dum awak kaphe ‘Oh watee mate pakriban ulah Meuteumee ngon jih dum malaikat Geupoh jih ligat hanaban peugah Geupoh bak muka di keu di likot Karasa azeub tutong that di kah
  51. Buet jaroe droe keuh yoh masa dilee Meunoe keuh lagee jinoe geubalah Kon na di Tuhan elanya hamba
  52. Saban cit juga Peureuʻun jadah Meunan keuh dilee kawom Peuraʻun Dilee lom jameun pih saban leupah Bandum jikaphe keu ayat Tuhan Neubri hukoman teuma le Allah Sabab dacha jih jeut keunong siksa Allah Taʻala teuga that leupah Siksa Neuh teuma meuleumpah that brat
  53. Atra nyan meuhat cit droejih salah Sabab di Tuhan ‘oh Neubri nikmat Bak saboh umat han roe Neuubah Jiubah keudroe jih han jiingat Neudeungo that-that bandum le Allah Bandum peukara Tuhan Neuteupue Hana meusapeue pih na meuilah
  54. Saban ngon ilee kawom Peuraʻun Dilee lom jameun pih saban leupah Jipeugah sulet ayat Tuhan jih Kamoe cok treuk jih binasa sudah Sabab dacha jih meupeubinasa Lam laot raya jih dum meukeubah Kamoe peukaram kawom Peuraʻun Sabab jih bandum lalem that leupah
  55. Nyang paleng jeuheut makheuluk Tuhan è Nyan keuh awak nyang kaphe keu Allah Han jimeuiman di jih keu Tuhan
  56. Janji ngon jih nyan sabe jiubah Lheuh tameujanji ngon jih han teupat Barangjan meuhat sabe jiubah Hana teumakot jih keu akibat
  57. Sabab nyan beu that keu jih tabalah Meunyo meureumpok jih dalam meuprang Di likot jih nyan dum tapeubicah Mangat jeut di jih nyan keu peuingat Hana le rakyat ka abeh sudah
  58. Meunyo khawater gata khianat Bak saboh umat janji jiubah Tapulang janji keu jih ban teupat Sabab khianat raya that salah Tuhan han suka keu soe khianat
  59. Di kaphe laknat pih bek sang ek glah Bek na jisangka sang ek peuglah droe Han ek di jih roe jilawan Allah
  60. Ube kuasa beu taseudia Alat cut raya dalam prang bicah Guda nyang pantah beu ka meuikat Musoh Hadharat bek tapeuleupah Jih musoh Tuhan ngon musoh gata Beu jieu gata sang juah-juah Meunyum teumakot ‘oh jieu gata Lom laen pih na nyang hana leumah Awak nyang laen hana taturi Tuhan Neuturi jih musoh Allah Teuma barangpeue nyang na bak gata Nyang tabeulanja bak jalan Allah Bandum Neubalah cukop keu gata Han Neuelanya teuh meuube seupah
  61. Meunyo jih ceundrong keu perdamaian Gata pih meunan bek na meuubah Teuma tawakai jok droe bak Tuhan Keubit cit Tuhan Neudeungo leupah Lom pih Neuteupue dum ngon ‘eleumee
  62. Meunyo jitipee teuh bek cit susah Meunyo meunapsu jikeumeung tipee Teuh tameulakee mantong bak Allah Cukop ngon Tuhan nyang tulong gata Neubri keu gata meunang ngon tuah Meunan pih bandum ureueng meuiman Tuhan bri meunang hana peue susah
  63. Tuhan peusaboh ate ureueng nyan Padahai gopnyan meupeucah-peucah Dum na beulanja di dalam bumoe Meu taboh keumoe tabri napakah Han ek meusaboh ate ureueng nyoe Teutapi jinoe kuasa Allah Ek Neupeusaboh ate ureueng nyan Keubit cit Tuhan perkasa leupah Lom bijaksana han ek takira
  64. Hai nabi gata cukop ngon Allah í Cukop ngon Tuhan ngon ureueng mukmin Nyang ka meuiman keupada Allah
  65. Hai nabi tayue mukmin jak meuprang Bah beu le lawan bek tameungalah Meunyo tasaba gata dua ploh Jih dua reutoh ek tapeubicah Gata sireutoh kaphe siribee Meunan meuteuntee Neukheun le Allah Sabab awak nyan cit hana meuphom Nyan keuh nyang kawom sabe lam salah
  66. Jinoe le Tuhan Neupeuphui gata Neuteupue gata leumoh that leupah Meunyo ngon gata na sireutoh droe Dua reutoh droe musoh beu bicah Teuntee ngon gata dum nyang ek saba Bek ate lia teumakot kalah Gata siribee jih dua ribee Talo jih teuntee ngon izin Allah Tuhan cit sajan ngon ureueng saba Ureueng nyang saba geunaseh Allah
  67. Sidroe-droe nabi hana bak gopnyan Ureueng tawanan nyang ka geukeubah ‘Oh geupeutalo musoh lam bumoe Baro watee nyoe tawanan nyang sah Napsu gata dum areuta donya Di Tuhan teuma ka lheuh Neukeubah Tuhan meunapsu pahla akhirat Keu gata meuhat nyang got that leupah Teuma cit Tuhan Maha Perkasa Ngon bijaksana areh that leupah
  68. Adak kon ka na putosan Tuhan Gata dum tuan meuhat ka salah Peue nyang ka tacok nibak awak nyan Keu gata tuan azeub geubalah Azeub raya that keu gata sunggoh
  69. Jinoe tapajoh hana le salah Tapajoh teuma ube bahgian Haleu that nyang nyan gata ka payah Rampasan lam prang nyang haleue nyang got Takwa teuh beu that teuma keu Allah Keubit cit Tuhan Maha Pengampon Lagi pih Tuhan Maha Pemurah
  70. Hai nabi takheun ubak awak nyan Nyang lam tawanan gohlom tapeuglah Meunyo Neuteupue got teuh le Tuhan Lam ate teuh nyan hana le salah Cit Neubri teuma bahgian gata Leubeh bak nyang ka geucok geurampah Lom Neupeuampon dum dacha gata Jeut meubahgia tawoe bak Allah Keubit cit Tuhan Maha Pengampon Lagi pih Tuhan Maha Pemurah
  71. Meu jikhianat napsu keu gata Khianat jih ka dilee keu Allah Teuma ka Neubri ek takuasa Hana le daya droejih jipeuglah Tuhan Neuteupue bandum peukara Lom bijaksana Neuh han ban peugah
  72. Ureueng meuiman nyang ka beurangkat Geutinggai teumpat geujak hijeurah Lom geuberjuang ngon arta gopnyan Ngon nyawong gopnyan bak jalan Allah Lom geubri teumpat keu ureueng teuka Geubantu teuma seunang ngon susah Ureueng nyan bandum tulong meunolong Sang saboh kawom hana meupisah Teuma mukmin nyang gohlom beurangkat Geutinggai teumpat gohlom hijeurah Han jeut tatulong lom dum ureueng nyan Sampoe ureueng nyan geujak hijeurah Meunyo geulakee bantu bak gata Dalam agama bak jalan Allah Lam hai nyan teuma wajeb tatulong Bek ateuh kawom nyang muahadah Kawom nyang ka lheuh janji ngon gata Nyan bek ta langga bek jeut keu salah Tuhan Neukalon peue nyang tapubuet Tan na meu bacut lupot bak Allah
  73. Di kaphe wali sabe droe-droe jih Gata deungon jih cit that meusiblah Nyang han tapubuet teuma lagee nyan Teuntee atra nyan jeut keu fiteunah Di dalam bumoe fiteunah meuhat Rusak raya that lom han ban peugah
  74. Ureueng meuiman nyang ka beurangkat Geutinggai teumpat geujak hijeurah Lom geuberjuang bak jalan Tuhan Nyan keuh nyang mukmin ureueng meutuah Lom geubri teumpat keu ureueng teuka Geubantu teuma seunang ngon susah Nyan keuh ureueng nyan mukmin nyang beuna Amponan teuma Neubri le Allah Neubri raseuki nyang that mulia
  75. ‘Oh lheuh nyan teuma na nyang hijeurah Ureueng meuiman dudoe nibak nyan Beurangkat lheuh nyan geujak hijeurah Lom geuberjuang sajan ngon gataa Nyan lagee gata saban that leupah Kawom keurabat nyang na hubongan Han roe that saban keurabat nyang sah Leubeh sigitu balaku patot Lagee teusebot lam Kitab Allah Keubit cit Tuhan dumpeue Neuteupue Hana meusapeue pih na meuilah AT-TAUBAH (TAUBAT)
Prev Next