26.The Poets

1. Ta Sin Mim. So Allah i Matao ko paka-a antapan Niyan ro-o
2. Giyaya na manga Ayat ko Kitab a miyakaosai
3. Ba-andangka mapakapagugut a Ginawangka (Ya Muhammad) ko di ran kabaloi a Khipaparatiyaya
4. O kabaya Ami, na Pakatoronan Nami siran A pho-on ko Langit sa Tanda, na matatap so manga lig iran sa Kapakasosondong iran non
5. Na da-a phakatalingoma kiran a Pananadum a pho-on ko (Allah a) Masalinggagao, a bago, a ba siran nda mabaloi a khitatalikhod Rukaniyan
6. Na Sabunar a piyakambokhag iran (so Rasul): Na phakatalingoma kiran ndun so manga Totholan ko miyabaloi siran non a gi-i ran shandagan
7. Ba iran nda mailai so Lopa,aikadakul a Piyakatho Ami ron ko oman i sasoson a mapiya
8. Mata-an! A adun a matatago ro-o man a titho a manga Tanda: Na da mabaloi so kadakulan kiran a Khipaparatiyaya
9. Na Mata-an! a so Kadnan Ka, na titho a Sukaniyan so Mabagur, a Makalimo-on
10. Na gowani na tiyawag o Kadnan Ka so Musa: Songka ko pagtao a manga darowaka
11. Pagtao o Pir-aon: Ino siran ndi Phananggila
12. Pitharo Iyan: Kadnan Ko! Mata-an! A Sakun na ipukhaluk Akun o ba Ako iran pakambokhaga
13. Go Gomagut a Rarub Akun, go di mapukas a dila Akun: Na Sogowingka so Haroun (sa mimbabid Akun)
14. Go adun a kasala-an Ko kiran, na ipukhaluk Akun o ba Ako iran bonowa
15. Pitharo (o Allah): A kuna pun nai! Na lalakao Kano a dowa, rakhus o manga Tanda Ami; Mataan! A Sukami na babid Iyo, a Puphamamakınug
16. Na Songkano ko Pir-aon, na Tharowa Niyo: A Mata-an! A Sukami na Sogo o Kadnan o manga Ka-adun
17. Botawaningka Rukami so manga Moriyatao o Israil
18. Pitharo (o Pir-aon): Ba ami Suka da Pagoyagoyaga si-i rukamı, ko Kawawata-i Ruka, go miyakatarug Ka rukami ko Kaoyagoyag Ka sa miyakaphipira ragon
19. Go Pinggolaolangka so Pinggolaolangka, a so Pinggolaolangka (a kiyapamono o Ka), na Suka na miyapud ko da-a manga Tadum Iyan
20. Pitharo (o Musa): Miyanggolaola Koto, na sa maoto na Sakun na pud ko Miyangariribat
21. Na piyalagoyan Ko sukano, ka kagiya ini kaluk Akun sukano; na bigan Ako o Kadnan Ko sa Ongangun, go biyaloi Ako Niyan a pud ko manga Sogo
22. Na giyoto man na Limo a Ipuphangalimo o ka Rakun noto,sa Kiyapangongoripunangka ko manga Moriyatao o Israil
23. Pitharo o Pir-aon: Na antona-a so Kadnan o manga Ka-adun
24. Pitharo (o Musa): A so Kadnan o manga Langit a go so Lopa, go so nganin a pagulutan a dowa nan,- o sukano na khitotomangkud
25. Pitharo (o Pir-aon) ko makalilibuton: Ba niyo da manug
26. Pitharo (o Musa): A so Kadnan niyo go Kadnan o manga lokus iyo a miyanga-o ona
27. Pitharo (o Pir-aon): A Mataan! a so Sogo rukano a so Siyogo rukano na Mata-an a Pumbuthangun
28. Pitharo Iyan: A Kadnan o Subangan a go so Sudupan, go so nganin a pagulutan a dowa nan! O sukano na shabota niyo
29. Pitharo (o Pir-aon): A Mataan a o kowa Ka sa Tohan a salakao Rakun, na Sabunar a itapi Ami Suka dun ko manga kalaboso
30. Pitharo Iyan: Ati apiya adun a mini-oma Ko ruka a Tanda a mapayag
31. Pitharo (o Pir-aon): Na talingoma-an Ka Sukaniyan, o miyabaloi Ka a pud ko manga bunar
32. Na ini ithog Iyan so Badas Iyan, na sa maoto na Sukaniyan na Nipai a mala
33. Go tiyonggos Iyan a lima Niyan, na sa maoto na Sukaniyan na Sindao (a miya-ilai o) khibabantal
34. Pitharo (o Pir-aon) ko manga Nakoda a lomilibuton: A Mataan naya! a titho a balik mata a lubi a Mata-o
35. Khabaya-an Niyan a mapaka-awa kano Niyan ko Lopa iyo sabap ko balik mata Niyan; na antona-a i pangoyao niyo
36. Pitharo iran: A pakalanatangka Sukaniyan go so Pagari Niyan, na Sogo ingka so manga Ingud sa kalimod iran
37. Ka-an niran ruka mawit so oman 1 balik mata a lubi a Mata-o
38. Na miyatimo so manga balik mata ko diyandi a kaputhatalabok ko gawi-i a miyapunto
39. Na Pitharo ko manga Manosiya: Ino sukano miyatimo kano
40. Ka-an tano kaonoti so manga balik mata, o mabaloi siran a siran 1 mamakada-ag
41. Na kagiya a makaoma so manga balik mata, na Pitharo iran ko Pir-aon: Ino Mata-an! A adun a mapumbagiyan namı a titho a balas o mabaloi kami a sukami i mamakada-ag
42. Pitharo iyan: Owai, go Mataan! A sukano sa maoto na pud dun ko manga dadasug (rakun)
43. Pitharo kiran o Musa: Ithogun niyo so sukano na ipagithog iyo
44. Na ini ithog iran so manga tali ran go so manga badas iran, go Pitharo iran: Ibut ko Munang o Piraon, ka Mata-an! A sukutano na sukutano dun i phamakapugus
45. Na ini ithog o Musa so Badas Iyan, na sa maoto na Sukaniyan na Puphulololokun Niyan so ipuphanaliba iran
46. Na Miyakasondong so manga balik mata, sa Khipakasosodod
47. Pitharo iran: Piyaratiyaya mi so Kadnan o manga Ka-adun
48. A Kadnan o Musa a go so Haroun
49. Pitharo (o Pir-aon): A Piyaratiyaya niyo to a da akun sukano pun kaidini; Mata-an! A Sukaniyan na titho a mala rukano a so Miyangundao rukano ko balik mata! Na Mata-an a katokawan niyo dun! Mata-an a pamotolan ko dun so manga lima niyo go so manga ai niyo sa di magonod, go Mata-an a sola-an ko sukano dun langon
50. Pitharo iran: a di rukami phaka morala so puki tumo rukami a pud ko siksa sa Donya Mata-an! A sukami na si-i bo ko Kadnan nami phamakandod
51. Mata-an! A sukami na maiinam ami a kanapiya rukami o Kadnan nami ko manga sala ami, sa kiyabaloi ami a paganai ko Miyamaratiyaya
52. Na ini Ilaham Ami ko Musa: A pangulumun Ka so manga Oripun Ko; Mata-an! A Sukano na phanalokonan Kano (iran)
53. Na Siyogowan o Pir-aon so manga Bandar a Ingud sa Kalimod iran
54. (Sa gi-i niyan Tharo-on:) Mata-an! A siran naya na titho a pagtao a manga i ito
55. Go Mata-an! A siran na titho tano iran a piyakanggani
56. Go Mata-an! A sukutano na langon tano dun maka- iktiyar
57. Na piyaka-awa Ami siran ko manga Pamomolan, go so manga Bowalan
58. Go so manga Kakawasa-an, go so darpa a mapiya
59. Lagid oto, na piyakipangowarisan Nami oto ko manga Meoriyatao o Israil
60. Na pithalokonan niran Siran ko kiyasubangi kiran o Alongan
61. Na kagiya a makamban taya so dowa a madakul, na Pitharo o manga pud o Musa Mata-an! A Sukutano na puraotun tano dun
62. Pitharo (o Musa): Kuna pun nai! Mata-an! A babid Akun so Kadnan Ko! Na Thoro-on Nako Niyan
63. Na ini Ilaham Ami ko Musa: A Buntolun Ka so Badas Ka ko Kalodan (na ini-buntol Iyan non). Na miyasurai, na mimbaloi so oman i sasurai a lagid o Palao a mala
64. Na piyakasipug Ami ro-o so manga salakao (kiran)
65. Na siyabut Ami so Musa a go so manga Pud Iyan, sa langon Siran
66. Oriyan niyan na inulud Ami so manga salakao (kiran)
67. Mata-an! A adun a matatago ro-o man a titho a Tanda: Na da mabaloi so kadakulan kiran a Khipaparatiyaya
68. Na Mata-an! A so Kadnan Ka na Sukaniyan ndun ı Mabagur, a Makalimo-on
69. Na Batiya-angka kiran so Totholan ko Ibrahim
70. Gowani na Pitharo Iyan ki Ama Iyan go so pagtao Niyan: Antona-a i Pushimba-an niyo
71. Pitharo iran: A Pushimba kami sa manga Barahala, na gi-i yami Mbabasa-alonganan a Kapushimba amı ron
72. Pitharo Iyan: A ino Pukhanug kano iran ko masa a Kapuphanongganoya niyo (kiran)
73. O di na khapiya - an kano iran, o di na khabinasa-an kano iran
74. Pitharo iran: A kuna, ka miyato-on nami so manga lokus ami a lagid oto a gi-i ran nggolaola-an
75. Pitharo Iyan: Aiguda iyo ko sukano na Pushimba-an niyo
76. Sukano go so manga lokus iyo a miyanga-o ona
77. Na Mata-an! A siran na ridowai Yakun, inonta so Kadnan o manga Ka-dun
78. A so Miyadun Rakun, go Sukaniyan i Punggonanao Rakun
79. Go Sukaniyan i Puphakakan Rakun, go Puphakainom Rakun
80. Go igira-a Miyasakit Ako, na Sukaniyan i Puphakapiya Rakun
81. Go Sukaniyan i Phakapatai Rakun, oriyan niyan na Pagoyagun Nako Niyan
82. Go Sukaniyan i Phangangarapanan Ko, sa napi Niyan Rakun so Kasala-an Ko ko gawi-i a kapamalas
83. Kadnan Ko! Bugi Yakongka sa Ongangun, go tapi-in Nakongka ko manga Bilangatao
84. Go Sunggai yakongka sa Bantogan a mapiya si-i ko phangao ori
85. Go Baloya Kongka a pud ko manga waris ko Sorga a Pakalma
86. Go Napi-ingka si Ama, Mata-an! A sukaniyan na miyabaloi a pud ko Miyangadadadag
87. Go Diyakongka Phakarondana ko gawi-i a Kaoyaga kiran (ko Alongan a Qiyamah)
88. Gawi-i a di phakanggai a gona so Tamok, go so manga Wata
89. Inonta so tao a minitalingoma Niyan ko Allah so poso a Linang
90. Na ipakarani so Sorga ko Miyamananggila
91. Go Pakisandungan so Naraka Jahim ko Miyangadadadag
92. Go Tharo-on kiran: Anda so sukano na Pushimba-an niyo
93. A salakao ko Allah? Ino khatabangan kano iran, o di na khatabangan niran a ginawa iran
94. Na Panalimpato-on siran roo,-siran a go so Miyangadadadag
95. Go so pagtao o Iblis sa kasamasama iran
96. Tharo-on niran a siran na gii siran ro-o shasawala
97. Ibut ko Allah, ka Mata-an a miyatago kamı dun ko kadadag a mapayag
98. Gowani a irimbang ami sukano ko Kadnan o manga Ka-adun
99. Na da-a miyakadadag rukami a rowar ko manga rarata i ongar
100. Na da-a bagiyan nami a phamakaogop
101. Go da-a bolayoka a gomagut sa ginawa (ko masosowa ami)
102. Na o Mata-an! A adun a kapakakasoi ami (sa doniya), na mabaloi kami a pud ko Miyamaratiyaya
103. Mata-an! A adun a matatago ro-o man a titho a Tanda, na da mabaloi so kadakulan kiran a Khipaparatiyaya
104. Na Mata-an! A so Kadnan Ka na Sukaniyan ndun so Mabagur, a Makalimo-on
105. Piyakambokhag o pagtao o Nuh so manga Sogo
106. Gowani na Pitharo kiran o Pagari ran a Nuh: Ino kano di Phananggila
107. Mata-an! A Sakun na Sogo rukano a kasasana-an
108. Na kalukun niyo so Allah, go Onoti Yako niyo
109. Na da-a Phangunin Ko rukano saya a balas: Da-a balas Rakun inonta si-i ko Kadnan o manga Ka-adun
110. Na kalukun niyo so Allah, go Onoti Ako niyo
111. Pitharo iran: Ino ami Suka Pharatiyaya-a a aya Phagonot Ruka na so tanto a manga bababa
112. Pitharo Iyan: A da ko Katao Akun so nganin a siran na gi-i ran nggolaola-an
113. So itongan kiran na si-i bo ko Kadnan Ko, o katawi niyo
114. Na kuna a ba Rakun pakiphamoga-on so Miyamaratiyaya
115. Sakun na matag Ako Puphamaka-iktiyar a mapayag
116. Pitharo iran: A Mata-an! A Odingka gunuki, hai Nuh! Na Mata-an a khabaloi Ka dun a pud ko Puraradiyamun
117. Pitharo Iyan: Kadnan Ko! Mata-an! A so pagtao Akun na piyakambokhag Ako iran
118. Na Kokoma Kongka a go siran sa Kokoman (a Ontol), go Sabuta Kongka a go so manga pud Akun a Miyamaratiyaya
119. Na siyabut Ami Sukaniyan a go so manga pud Iyan, ko Kapal a mapupuno
120. Oriyan niyan na inulud Ami ko kiya-ipos oto so miyangalalamba
121. Mata-an! A adun a matatago ro-o man a titho a Tanda: Na da mabaloi so kadakulan kiran a Khipaparatiyaya
122. Na Mata-an! A so Kadnan Ka na Sukaniyan ndun so Mabagur, a Makalimo-on
123. Piyakambokhag o (pagtao a) Ad so manga Sogo
124. Gowani na Pitharo kiran o Pagari ran a Hud: Ino kano di Phananggila
125. Mata-an! a Sakun na Sogo rukano a Kasasarigan
126. Na kalukun niyo so Allah, go Onoti Yako niyo
127. Go da-a Phanguning Ko rukano saya a balas: Da-a balas Rakun inonta so si-i ko Kadnan o manga Ka-adun
128. Ino kano gi-i mbabalai ko oman i darpa a maporo sa to-os a karimbaran niyo
129. Go Puphangumba-al kano sa manga Torogan ka angkano makakal
130. Go igira a minggolima kano, na minggolima kano a khipamumundug
131. Na kalukun niyo so Allah, go Onoti Yako niyo
132. Na kalukun niyo so (Allah a) migai rukano ko nganin a katawan niyo
133. Migai rukano ko manga Ayam go manga Wata
134. Go manga Pamomolan go manga bowalan
135. Mata-an! A Sakun na ikhawan Nakun sukano ko siksa ko gawi-i a mala
136. Pitharo iran: Magishan rukami o ino Miyanguthoma Ka antawa-a da Ka mabaloi a pud ko manga Pangunguthoma
137. Da ko ungkaya inonta na Parangai o miyanga-o ona
138. Na kuna a ba kami phangasisiksa
139. Na piyakambokhag iran Sukaniyan, na bininasa Mi siran. Mata-an! A adun a matatago ro-o man a titho a Tanda: Na da mabaloi so kadakulan kiran a Khipaparatiyaya
140. Mata-an! A so Kadnan Ka na Sukaniyan ndun so Mabagur, a Makalimo-on
141. Piyakambokhag o (pagtao a) Samood so manga Sogo
142. Gowani na Pitharo kiran o Pagari ran a Salih: Ino kano di phananggila
143. Mata-an! A Sakun na Sogo rukano a kasasana-an
144. Na kalukun niyo so Allah, go Onoti Yako niyo
145. Na da-a phangunin ko rukano saya a balas: Da-a balas Rakun inonta so si-i ko Kadnan o manga Ka-adun
146. Ba kano khibagak, si-i ko nganin a matatago si-i a khisasarig kano
147. Si-i ko manga Pamomolan go manga Bowalan
148. Go manga Purpuran, go manga Qormah a so Onga niyan na kiyalotowan
149. Go Puphamuso kano ko manga Palao sa manga Walai, a pukhababaya kano
150. Na kalukun niyo so Allah, go Onoti Yako niyo
151. Na di niyo Pagonoti so Sogowan o manga Malawani
152. A siran na Puphaminasa siran ko Lopa, go di siran Phangompiya
153. Pitharo iran: A Suka na pud dun ko khitataraponan
154. Kuna a ba Ka di Manosiya a lagid ami: Na bugai Ka sa Tanda, o Suka na pud ko manga bunar
155. Pitharo Iyan: A kati-i so Onta: A adun a kipantag iyan ko kainom, go adun a kipantag iyo ko kainom, ko gawi-i a mapupunto
156. Na di niyo shogata sukaniyan a marata, ka madansal kano a siksa ko gawi-i a mala
157. Na biyono iran noto: Na miyabaloi siran a miyamakasundit
158. Na miyadansal siran o siksa. Mata-an! A adun a madadalum ro-o man a titho a Tanda: Na da mabaloi so kadakulan kiran a Khipaparatiyaya
159. Na Mata-an! a so Kadnan Ka na Sukaniyan ndun so Mabagur, a Makalimo-on
160. Piyakambokhag o pagtao o Lut so manga Sogo
161. Gowani na Pitharo kiran o Pagari ran a Lut: Ino kano di Phananggila
162. Mata-an! A Sakun na Sogo rukano a kasasana-an
163. Na kalukun niyo so Allah, go Onoti Yako niyo
164. Na da-a phangunin Ko rukano saya a balas: Da-a balas Rakun inonta so si-i ko Kadnan o manga Ka-adun
165. Ino niyo Puphangabaya i so manga Mama ko manga Ka-adun
166. Na Pungganata niyo so Inadun rukano o Kadnan niyo a manga Karoma niyo? Kuna, ka sukano na pagtao a manga Malawani
167. Pitharo iran: A Mata-an a Odingka gunuki, hai Lut! Na Mataan a khabaloi Ka dun a pud ko piyamaka-awa
168. Pitharo Iyan: A Mata-an! A Sakun na pud ko Pukhakararangit ko galubuk iyo
169. Kadnan Ko! Sabut Akongka a go so Ta-alok Rakun pho-on ko gi-i ran nggolaola-an
170. Na siyabut Ami Sukaniyan a go so ta-alokon a kasamasama iran
171. Inonta so lokus (a Karoma Niyan) ka minitapi ko miyangakakakal ko siksa
172. Oriyan niyan na piyolang Ami so manga salakao (kiran)
173. Go piyakaoranan Nami siran sa oran (a Ator): Na miyakaratarata a ini oran ko piyamaka-iktiyar (a da dun Paratiyaya)
174. Mata-an! A adun a matatago ro-o man a titho a Tanda: Na da mabaloi so kadakulan kiran a Khipaparatiyaya
175. Na Mata-an! A so Kadnan Ka na Sukaniyan ndun so Mabagur, a Makalimo-on
176. Piyakambokhag o manga tao sa Aikah so manga Sogo
177. Gowani na Pitharo kiran o Shv’aib: Ino kano di Phananggila
178. Mata-an! A Sakun na Sogo rukano a kasasana-an
179. Nakalukun niyo so Allah, go Onoti Yako niyo
180. Na da-a Phangunin Ko rukano saya a balas: Da-a balas Rakun inonta so si-i ko Kadnan o manga Ka-adun
181. Tarotopa niyo so kapagasad, na o ba kano mabaloi a pud ko puphamangorang
182. Na thimbang kano ko timbangan a maka-o ontol
183. Go da-a khoranga niyo ko manga Manosiya ko nganinganin niran, go di kano phangalandada ko Lopa, a puphamaminasa kano
184. Go kalukun niyo so (Allah a) Miyadun rukano, go (Miyadun ko) manga Ka-adun a miyanga-o ona
185. Pitharo iran: A Suka na pud dun ko khitataraponan
186. Na kuna a ba Ka di Manosiya a lagid ami, na Mata-an! A arangan nami Ruka na pud dun ko manga bokhag
187. Na ologi Kamingka sa pisha gintasan ko siksa ko Langit, o Suka na pud ko manga bunar
188. Pitharo Iyan: A so Kadnan Ko i Mata-o ko gi-i niyo nggolaolaan
189. Na piyakambokhag iran Sukaniyan. Na miyadansal siran o siksa ko Alongan a kinilalansai o gabon, Mata-an naya! A miyabaloi a siksa ko Alongan a mala
190. Mata-an! A adun a matatago ro-o man a titho a Tanda: Na da mabaloi so kadakulan kiran a Khipaparatiyaya
191. Na Mata-an! A so Kadnan Ka na Sukaniyan ndun so Mabagur, a Makalimo-on
192. Na Mata-an a giya Qur-an naya! A titho a Initoron o Kadnan o manga Ka-adun
193. Initoron naya o Niyawa a kasasarigan (a so Jibril)
194. Si-i ko poso o Ka (Ya Muhammad), ka Angka mabaloi a pud ko Miyamaka-iktiyar
195. Sa basa Arab a mapayag
196. Na Mata-an naya! a titho a madadalum ko manga Kitab a miyanga-o ona
197. Ba da-a Mīiya-adun kiran a Tanda a katawan Sukaniyan o manga Olama ko manga Moriyatao o Israil
198. Na o Initoron Nami Sukaniyan ko saba-ad ko kuna a ba manga Arab
199. Na go Niyan kiran noto Biyatiya, na di ran noto Pharatiyaya-an
200. Lagid aya a kiyapakasolud Ami ron ko manga poso o manga rarata i ongar
201. Di ran noto Pharatiyaya-an taman sa di ran kasandungan so siksa a malipudus
202. Na Makatalingoma kiran (so siksa) sa mitalumba, a siran na di-iran mai-inungka
203. Na Matharo iran: Ino sukutano khata-alik rukutano
204. (Pitharo o Allah:) Ino a so siksa ami na puphangunin niran a kaga-an niyan
205. Aiguda-a Ka? Amai ka pakasawitun Nami siran ko kapipiya a ginawa sa phipira ragon
206. Oriyan niyan na makaoma kiran so ini-diyandi kiran (a siksa)
207. Na di kiran makalinding so piyakisawitan kiran a kapipiya ginawa
208. Na da-a bininasa Mi a Phagingud, a ba da-a Miyamakaiktiyar ron
209. Pananadum; na kuna a ba Kami manga salimbot
210. Go kuna a ba Initoron Sukaniyan o manga Shaitan
211. Go di kiran patot, go di ran khagaga
212. Mata-an! A siran na so kapamamakinug (ko Langit) na piyakigunukan kiran ndun
213. Na di Ka Phanongganoi sa pud o Allah, a Tohan a salakao ka Mabaloi Ka a pud ko phangasisiksa
214. Na Paka-iktiyarangka so manga Tonganaingka, a manga dadasug
215. Go Paka-inayangka so Gowagowaingka ko tao a Miyonot Ruka, a pud ko Miyamaratiyaya
216. Na amai ka Sorangungka iran, na Tharowangka: A Mata-an! A Sakun na angiyas Ako ko gi-i niyo nggolaola-an
217. Go Panarig Ka ko (Allah a) Mabagur, a Makalimo-on
218. A so puphakailai Ruka ko masa a Kaputhindug Ka
219. Go so Kapuphagukaskas Ka a rakhus o Puphamanojiod
220. Mata-an naya! A Sukaniyan so Puphakanug, a Mata-o
221. Ba Ko rukano Phanothbola, so tao a puthupadan o manga Shaitan
222. Puthupad ko oman i bokhag, a baradosa
223. A tatandangan niran sa Pamamakinugan (so manga Shaitan), na so kadakulan kiran na manga bokhag
224. Na so manga Pababayok,na Phagonotan siran o Miyangadadadag
225. Bangka da mailai a Mata-an! A siran na puphuromparompak siran ko oman i labowai
226. Go Mata-an a siran na gi-i ran Tharo-on so di ran Punggolaola-an
227. Tabiya-on so Miyamaratiyaya, go Pinggalubuk iran so manga pipiya, go Tiyaduman niran so Allah sa madakul, go siyabut iran a ginawa iran ko oriyan o kiyasalimboti kiran; na katokawan ndun o siran a manga salimbot o antona-a darpa a khandodan i khandodan niran