26.The Poets

Ta. Sin. Mim
Tsena ke lits’enolo tsa Lengolo tse totobatsang
Kamohlomong u tla ituba moeeng ka ho utloa bohloko, hobane ba sa kholoe
Hoja ebe ke Thato Ea Rona, Re ka be Re romela sesupo ho bona se tsoang marung, hore ba tle ba lule ba kebisitse melala ka boikokobetso
Ka linako tsohle ha sehopotso se etla ho bona se secha se tsoang ho Ea Tletseng Lereko, ba ea furalla
Ba latola molaetsa; empa haufi ba tla tseba `nete ea seo ba ‘nileng ba se soma
Na ha ba es’o bone lefats’e, – hore ke mefuta e molemo ea lintho tseo Re li melisang teng
Ruri! Kahar’a sena ke sesupo; le hoja bongata ba bona bo sa lumele
Etsoe Ruri! Mong`a hau U Matla Oohle, Mohau oa Hae o’a Khaphatseha
Mong`a hau U ile A bitsa Moshe: “Tsamaea o ee ho batho ba etsang liphoso
“Batho ba Faro. Na ba tla ts’aba Allah?”
A re: “Mong`a ka! Ke t`saba hore ba tloha ba mphara ka leshano
“Sefuba sa ka se tla petatsana. Puo ea ka e se hlake, kahoo nthome le Aarone
“Ba bile ba na le qoso ea tlolo ea molao khahlano le ‘na, ka hona ke t`saba hore ba se tlohe ba mpolaea.”
Allah A re: “Leletho, Tsoelang pele, bobeli ba lona ka lits’upiso tsa Rona. Ruri! Re tlabale lona, le hona ho le mamela
“Joale, tsamaeang ‘moho le ee ho Faro, le re: “Re rometsoe ke ‘Maballi le Mong`a mafats’e ho uena
“Lokolla bana ba Israele ho tsamaea le rona.”
Faro a re: “Na ha re’a u holisa o le ngoana har’a rona? Oa lula lilemo tse ngata le rona bophelong ba hau
“Eaba o etsa ketso eo u kileng oa e etsa, eo u e tsebang, oa ba e mong oa ba hlokang teboho!”
Moshe a re: “Ke entse, nakong eo ke neng ke le ka har’a ba khelohileng
“Ka lebaka la ho le t`saba ka baleha, Empa Mong`a ka U ile a nts’usumetsa ka taelo esita le hona ho nkhetha ke le e mong oa baromuoa ba Hae
“Joale, sena ke ke tsela eo u mputsang ka eona, u nts’eolla ka hore: ke entse bana ba Israele makhoba.”
Faro a re: “Joale, ke eng ‘Maballi le Mong`a mafats’e?”
Moshe a re: “Mong`a maholimo le lefats’e le lintho tsohle tse teng lipakeng tsa ona, – haeba u batla ho rua tsebo.”
Eaba faro o re ho ba neng ba mo pota-potile: “Na le’a utloa?”
Moshe a re: “Mong`a lona le bo-ntat’a lona ho tloha ts’imolohong.”
Faro a re: “Ruri! Moromuoa enoa ea romeletsoeng ho lona e feela e le lehlanya!”
Moshe a re: “Mong`a bochabela le bophirima le tsohle tse lipakeng tsa tsona, ha feela ebale na le kutloisiso.”
Faro a re: “Ha feela eba u ka ikhethela molimo e mong ntle ho ‘na, Ruri! Ke tla u koala chankaneng.”
Moshe a re: “Le hoja ke u bonts’a se seng se hlakileng?”
Faro a re: “Se bonts’e, haeba u e mong oa ba nang le ‘nete!”
Eaba Moshe o akhela lere la hae fats’e, la fetoha noha
A pholla lehlakore ka letsoho la hae, eaba le hlaha le le lesoeu ho babohi
Faro a sebela Mahlahana a hae, a re: “Ruri! Enoa ke moloi oa sebele
“Morero oa hae ke ho le phalalisa naheng ea lona ka mehlolo ena ea hae. Joale, ke eng seo le ka nkeletsang ka sona?”
Ba re: “Ak’u ba boloke hanyane ka bobeli ba bona, joale e be u romella maqosa metseng
“Ba u tlisetse litsibi tsohle tsa boloi.”
Baloi bohle ba bokelloa hammoho ka nako e boletsoeng mohla letsatsi le neng le khethiloe
Eaba ho thoe ho sechaba: “Na le se le khobokane hammoho?”
“Hore re tle re latele baloi haeba ba ka ikhapela tlholo?”
Eitse hoba baloi ba fihle ho faro, ba re ho eena: “Na ka ‘nete re tla fumana moputso haeba re fumana tlholo?”
A re: “E ho joalo, e bile ka ‘nete le tla ba har’a ba atametseng haufi le ‘na.”
Moshe a re ho bona: “Akhang lithebere tsa lona!”
Eaba ba akha liketane le lithebere tsa bona, ba re: “Ruri! Ka matla a Faro, re tla ikhapela tlholo.”
Moshe a akhela lere la hae fats’e, eaba le fetoha noha le koenya lintho tsohle tseo ba neng bali akhile ka ponts’o ea bohata
Eaba baloi ba oela fats’e ba ithapalatsa
Ba re: “Re kholoa ho Mong`a Mafats’e
“Mong`a Moshe le Aarone.”
Faro a re: “Le kholoa ho Eena joang ke’a s’o le nehe tumello. Ntle le khoao ke nkhekhe ea lona e le rutileng boloi! Empa ka ‘nete le tla tseba
Ruri! Ke tla poma matsoho le maoto a lona mots’ekalle, e be ke’a le thakhisa kaofela ha lona.”
Ba re: “Ha ho se ka re utloisang bohloko, hobane re tla boela ho Mong`a rona
Takatso ea rona ke feela hore Mong`a rona o tla re ts’oarela libe tsa rona, hobane ke rona ba pele ba amohelang tumelo.”
Eaba Re susumetsa Moshe: “Tsamaeang le makhabunyane A ka bosiu bohle, hobane le tla tla le setsoe morao.”
Kemoo Faro a ileng a romella maqosa metseng
A re: “Ruri! Ma-Israele ana ke lequloana le fokolang
“Ba khahlanong le rona
“Re lebotho le hlometseng le malala-a-laotsoe.”
Ke kamoo Re ileng Ra ba lelekela thoko le lirapa, liliba tse ts’akhunyang
Matlotlong le maemong ohle a hlomphehang kateng
E joalo, Re ile Ra etsa hore bana ba Israele e be majalefa a lintho tseo
Ba ba beha meja esale ka matjeke
Ha bobeli bo bonana, ba neng ba ena le Moshe ba re: “Ruri! Re se re ts’oeroe.”
Moshe a re: “Che, Mong`a ka o na le ‘na. Ke Eena ea tla ntataisa
Eaba Re susumetsa Moshe: “Otla leoatle ka lere la hau.” Eaba leoatle le’a arohana, karolo e ngoe le e ngoe ea ipopa thajana
Eaba Re atametsa lichaba ka bobeli haufi le moo
Re ile Ra pholosa Moshe le bohle ba neng ba ena le eena
Eaba Re khamisa lebotho la Faro ka metsi
Ruri
Empa Ruri! Mong`a hau o na le Matla Oohle, o Tletse Mohau
Ak’u ba phetele pale ea Abrahama
Mohla a neng a buoa le ntata’e le batho ba habo a re: “ke eng sena seo le se khumamelang?”
Ba re: “Re khumamela lits’oants’o tse betliloeng, re ke ke ra khaohana le eona.”
Abrahama a re: “Na li ea le utloa nakong eo le memetsang ho tsona, kapa hona ho le etsetsa botle kapa bobe
Ba re: “Che, re fumana bo-ntat’a rona ba ntse ba li khumamela.”
A re: “Na le’a bona eo le khumamelang
“Lona le bo-ntat’a lona pele ho lona
“Kaofela ha tsona ke lira ho ‘na; empa e seng Mong`a mafats’e
«Ea ntlhotseng, Ke Eena ea ntataisang
“Ea mphepang le hona ho mpha metsi
«Ha ke kula, ke Eena ea mphekolang
“Ea tla etsa hore ke shoe, A boele A ‘nehe bophelo hape
“Eena Eo ke nang le khopolo ea hore, U tla nts’oarela libe tsa ka mohla Letsatsi la Kahlolo
“Mong`a ka! Ak’u nkekeletse bohlale, U be U nkopanye le bohle ba lokileng
“U mphe tlaleho e hlomphehileng melokong e tlang
“U nketse e mong oa majalefa a Serapa sa Nyakallo
“Ts’oarela ntate oa ka. Hobane le eena ke e mong oabakhelohileng
“U tle u se ke oa ntlotlolla mohla letsatsi leo U tla tsosa batho ka lona
“Letsatsi leo ka lona leruo le bara li ke keng tsa re thusa ka letho
«Kantle le ea ikatamelitseng haufi le Allah ka pelo eohle
“Serapa se tla atametsoa haufi le bohle ba nenang bobe
“Lihele li tla hlahella ponts’eng ho bohle ba hlahlathellang bobeng
“Ho tla thoe ho bona: “E kae melingoana eo le neng le e khumamela
“Kantle ho Allah? Na eka le thusa le hona ho ithusa?”
“Joale, batla lahleloa ka sefutho ka har’a Lihele,-bona le ba hlahlathellang bobeng
“Le mabotho oohle a iblis hammoho
“Ba tla phehisana khang kamoo
“Ruri! Ka Allah, ka ‘nete re bile phosong e totobetseng
“Nakong eo re neng re le lekanya le Mong`a Mafats’e
“Le baeki ba rona ke ba neng ba khanathetse molato feela
“Ha joale ha re na ‘muelli
«Kapa ena motsoalle le ea hore utloela
“Hoja re ne re ka ba le monyetla oa ho khutlela morao, Ruri! Re ne re tla ba har’a ba kholoang!”
Ruri
Ruri! Mong’a hau, Ke Eena Ea Matla Oohle, U Tletse Mohau
Le batho ba habo Nooe ba kile ba nyelisa baromuoa ba Allah
Ngoana bo bona Nooe o ne a re ho bona: “Na le sa tla ke le ts’abe
Ke moromuoa ea t`sepahalang ea romiloeng ho lona
Kahoo, ts’abang Allah, le ‘mamele
Ha ho moputso oo ke le kopang ona holim’a sena; moputso oa ka o tsoa feela ho Mong`a mafats’e
Ka hona, ts’abang Allah, le ‘mamele.”
Ba re: “Re ka kholoa ho uena, empa batho ba eisehang ba u latetse morao?”
A re: “Ke tseba joang ka tseo ba li etsang
“Boikarabello ba bona bo ho Mong`a ka, hoja feela eba le utloisisa
“Ha ke’a tla ho tla phalalisa ba kholoang
“Ke rometsoe ho hlokomelisa pepeneneng.”
Ba re: “Nooe, haeba u sa khaotse, u tla tlepetsoa ka majoe.”
A re: “Mong`a ka! Ruri! Batho ba heso ba ea ntatola
“Ak’u ahlole lipakeng tsa rona le bona ka kahlolo e senang leeme, U mpholose le ba kholoang bohle ba nang le ‘na.”
Eaba Re’a mo pholosa hammoho le bohle ba neng ba ena le eena ka Arekeng
Kamor’a ho moo Ra khamisa bohle ba setseng ka metsi
Ruri ho sena ke sesupo, empa bongata ba bona ha bo kholoe
Ruri! Mong’a hau, Ke Eena Ea Matla Oohle, U Tletse Mohau
Ba-Ad ba ile ba latola Baromuoa ba Allah
Ngoana bo bona Hud a re ho bona: “Na le sa tla ke le ts’abe Allah
“Ke moromuoa ea t`sepahalang ea romiloeng ho lona
“Kahoo, ts’abang Allah, le ‘mamele
“Ha ho moputso oo ke le kopang ona; moputso oa ka o ho Mong`a mafats’e feela
“Na le ka aha sefika holim’a leralla le leng le le leng ho ithabisa
“Le aha le matlo a matle a bolulo, khopolong ea ho phela teng kahosafeleng
“Ha le sebelisa matla a lona, le ea sebelisa joalo ka batho ba nang le matla oohle
“Ts’abang Allah, le ‘mamele
“Ts’abang Eena Ea le sitsitseng ka lintho tsohle tseo le li tsebang
“U le setsitse ka makhomo le bara
“Lirapa le liliba tse ts’akhunyang
“Ke na le ts’abo ea Kahlolo ea mohla Letsatsi le Ts’abehang.”
Ba re: “Ho ea ts’oana ho rona hore na u oa re khalema kapa u ba sieo hara bakhalemi
“Tsena ha se letho, haese tsona linthoana tsa mehleng ea khale
«Ha re ke ba ka amohelang mahloko kapa likahlolo!»
Ba ile ba mo latola; Ra ba ripitla. Ruri! ho sena ke sesupo, empa boholo ba bona bo sa kholoe
Ruri! Mong’a hau U Matla Oohle, Mohau Oa Hae o’a Khaphatseha
Ba-Thamud, ba ile ba latola Baromuoa ba Allah
Ngoana bo bona Salih a re ho bona: “Na le sa tla ke le Ts’abe
“Ke moromuoa ea t`sepahalang ea romiloeng ho lona
“Kahoo, ts’abang Allah, le ‘mamele
“Ha ho moputso oo ke le kopang oona; moputso oa ka o ho Mong`a mafats’e feela
“Na le hopola hore le ts’ireletsong ka lintho tsohle tseo le nang le tsona hajoale
“Lirapa le liliba tse ts’akhunyang
“Masimo a poone le lifate tsa lipalema tse behileng haholo hooli ka ‘nang tsa robeha
“Le hona ho honya mafika ho etsa matlo ka botsebi bo matla
“Empa ts’abang Allah le ‘mamele
“Le se latele taelo ea ea lehlasoa
“Ea jalang pherekano lefats’eng, ea sa rateng ho sokoloha.”
Ba re: “uena u e mong oa ba louoeng
“U motho joalo ka rona. Kahoo, hlahisa sesupo haeba u bua `nete.”
Salih a re: “Bonang, kamele ke ena e ts’ehali. Le eona e na le tokelo ea ho noa Selibeng ka letsatsi le leng, le lona le na le tokelo e joalo ka letsatsi le leng, empa ka letsatsi le boletsoeng
«Le se e nt`se kotsi esere la tloha la oeloa ke Kahlolo ea Letsatsi le Ts’abehang.”
Empa ba ile bae khakhatha, eaba ba apareloa ke masoabi
Ba oeloa ke kahlolo. Ruri! ho sena ke sesupo, empa bongata ba bona bo sa kholoe
Ruri! Mong’a hau U Matla Oohle, U Tletse Mohau
Batho ba habo Lota ba ile ba latola Baromuoa ba Allah
Ngoana’bo bona Lota a re ho bona: “Na le sa tla ke le Ts’abe
‹Ke moromuoa ea t`sepahalang ea romiloeng ho lona
“Kahoo, ts’abang Allah le ‘mamele
“Ha ho moputso oo ke le kopang ho lona; moputso oa ka o ho Mong`a mafats’e feela
“Har’a libopuoa tsohle lefats’eng le arorelana likobo le banna ba bang
“Le siee bao Mong`a lona a le hloletseng bona? Che, le batho ba tlotseng meeli eohle.”
Ba re: “Oho Lota haeba u sa khaotse, ruri u tla lelekoa.”
A re: “Ke hloile liketso tsa lona
“Mong`a ka! Ak’u mpholose le ba lelapa la ka ho tseo ba li etsang!”
Re ile ra mo pholosa ‘moho lebalelapa la hae,-bohle
“Ntle feela le mosali moholo ea neng a le har’a ba neng ba salatse morao
Empa Ra ripitla bohle
Ra ba nesetsa majoe a lengetana: E ts’abehang pula ho ba neng ba khaleng’oe
Ruri! ho sena ke sesupo, empa bongata ba bona bo sa kholoe
Ruri! Mong’a hau U Matla Oohle, U Tletse Mohau
Balekane ba Moru ba ile ba latola Baromuoa ba Allah
Shuaib a re ho bona: “Na le sa tla ke le Ts’abe
“Ke moromuoa ea ts’epahalang ea romiloeng ho lona
“Kahoo ts’abang Allah le ‘mamele
“Ha ho moputso oo ke le kopang ona; moputso oa ka o tsoa ho Mong`a mafats’e feela
«Fanang ka tekanyo e nepahetseng, le se ke la jalletsa
«Le be le bekhe ka nepo le ‹nete
“Le se ke la ja batho ling tsa bona, le ho etsa bokhopo ka ho fehla pherekano lefats’eng
“Le ts’abe Eena Ea le hlotseng le meloko pele ho lona.”
Ba re: “Uena u e mong oa ba louoeng
“U motho joalo ka rona, re nahana hore u leshano
“Ak’u etse hore lekumane la leholimo le re oele, haeba u buoa ‘nete.”
A re: “Ke Mong`a ka Ea hlokolosi ka ho fetisisa malebana le tseo le li etsang.”
Ba ile ba mo latola, eaba ba oeloa ke kotlo ea Letsatsi la mahlomola. Ruri! E bile Kotlo ea Letsatsi le Ts’abehang
Ruri! ho sena ke sesupo, empa bongata ba bona bo sa kholoe
Ruri! Mong’a hau U Matla Oohle, U Tletse Mohau
Ruri sena ke Ts’enolo e tsong ho Mong`a Mafats’e
E theohile le moea oa ‘Nete le Tumelo
Pelong le kelellong ea hau, hore u tle u khaleme
Ka puo e mathemaloli ea Se-Arabia
Kantle ho khoao e teng ka har’a mangolo a halalelang a batho ba khale-khale
Ana ha se sesupo ho bona ha barutehi ba bana ba Israele ba e tseba
Hoja e be Re ile Ra le senolela e mong oa sechaba ntle le sa Ma-Arab
A ba balla lona, ba ne ba ke ke ba kholoa ho lona
Ke kamoo re etsang hore le kene lipelong tsa Baetsa-libe
Ba ke ke ba kholoa ho lona ho fihlela ba bona kahlolo e Mahlonoko
Empa e tla ba fihlela ka ts’ohanyetso ba sa elelloe
Joale ba tla re: “Re tla fuoa nyehlisetso?”
Ana ba lakatsa ho potlakela kahlolong ea Rona
Na u oa hlokomela? Hore haeba Re ka ba neha nyehlisetso ea lilemo tse ‘maloa
Ha ho fihla kahlolo eo e saleng ba e ts’episoa
Tsohle tseo e saleng ba ithabisa ka tsona li ke ke tsa ba thusa ka letho
Ha ho motse oo Re kileng Ra o ripitla o sa kang oa romelloa bahlokomelisi
Molemong oa ho ba hopotsa, ha Re’a s’o ka Re eba bahanyapetsi
T`senolo ena ha e ea tlisoa ke bo-liabolosi lefats’eng
E bile ha e ea ba lokela, kapa ona matla a ho e hlahisa
Ruri! ba qheletsoe thoko le ho e utloa
Kahoo, u se bitse ho mang kapa mang ntle ho Allah, esere oa tloha oa ba e mong oa ba tla fumana kotlo
U khaleme ba leloko la hau ba haufi le uena
U be pelo-tlhomohi ho Ba-kholoang ba u latelang
Empa haeba ba ke ke ba u mamela, e re: “Ruri! Ha ke na molato ho tseo le li etsang.”
U behe ts’epo ea hau ho Ea Matla Oohle, Ea Tletseng Mohau
Eena Ea u bonang nakong eo u emeng u rapelang
Ea bonang le boikokobetso ba hau har’a baithapalatsang thapelong
Hobane Ke Eena Ea Utloang le ho tseba tsohle
Ana nka le bolella ka bao bo-liabolosi ba theohelang holim’a bona
Ba theohela holim’a bohle ba leshano, ba khopo
Ba ts’ollela litsebeng tsa bona lipuo tsa mafeela, boholo ba bona ba leshano
Le Bareneketsi, – bohle ba fosahetseng ba ba sala morao
Ana ha u es’o bone kamoo ba khelohileng ba phaqola hoohle
Le kamoo ba buoang ka seo ba sa se etseng
Kantle le ba kholoang, ba etsa liketso tse lokileng, le hona ho hopola Allah ka linako tsohle, le hona ho its›ireletsa kamor’a hoba ba tlatlaptjoe. Baetsalibe bona, haufinyane ba tla ruoa tsebo ka se seholo seo e tlang ho ba pheletso ea bona

Prev Next