23.The Believers

Abaphumeleleyo ngokwenene ngamakholwa
Abo benza iSalâh yabo ngokuzithobileyo
Nabo bazikhwebulayo kwintetho ekukungcola
Nabo bahlawula iZakâh (rhoqo)
Nabo balondoloza iindawo zabo ezinqabileyo ekungcoleni
Ngaphandle kwakubafazi babo okanye kwabo izandla zabo zokunene zibabambileyo, kuba ngenene bona abayi kubekwa tyala
Kodwa lowo ufuna okungaphaya kunoko, abanjalo ke ngabagabadeli
Ke bona abo bathembakalayo kwizithembiso zabo nakoko bakugcinisiweyo
Nabo balondoloza iiSalâh zabo (ngononophelo olungqongqo)
Aba ke ngabona zindlalifa zokwenyani
Abaza kuyidla ilifa iFirdaws (iPaladesi). Bona baya kuhlala apho ngonaphakade
Kananjalo inene Thina Samdala umntu ngengcucu yodongwe
Emva koko Sambeka eliqabaza lembewu yomntu kwindawo ekhuselekileyo (isibeleko somfazi)
Saza emva koko Senza iqabaza (elo) lembewu yomntu laba lihlwili elinamathelayo. Saphinda Senza iqabaza lembewu yomntu laba ligaqa (lesihlunu), Saza Senza egaqeni (elo) amathambo; Saza Sawagquma amathambo ngenyama; Saphinda Samphuhlisa waba sesinye isidalwa. Ngoko ke Usikelelekile uAllâh, Ongoyena Mdali Ugqibeleleyo kubadali
Ukanti inene emva koko nisaza kufa
Kananjalo inene nina, ngoMhla woVuko, niza kuvuswa
Yaye Sidale phezu kwenu amazulu asixhenxe, ukanti aSizanga Thina Singabi nalwazi ngendalo (yeThu)
Ke kaloku Sithumele imvula phantsi isuka esibhakabhakeni ingomlinganiselo ometiweyo, ize ihlale emhlabeni. Kanti ke Siyakwazi nokuyithabatha imke
Kananjalo Sinenzele ngayo imiyezo yemithi yesundu nezidiliya ezineziqhamo ezininzi enizityayo
Kananjalo (Sinihlumisele) umthi ophuma kwintaba yeSinayi ovelisa ioli nokudla (umnquma) enikutyayo
Inene kuni ezilwanyaneni zemfuyo kukho isifundo (kuzo). Sinipha ukuba nisele koko kuvela eziswini zazo, yaye okwenu kuzo apho zizinto ezininzi eziyinzuzo kuni ukanti kwakuzo apho niyadla
Ke kaloku apho ngazo nangeenqanawa niyathwalwa
Inene Thina Sathumela uNûh kubantu bakubo, yaye wathi: “Hini na bantu bakuthi! Khonzani uAllâh! Aninaye omnye uthixo ngaphandle kwaKhe. Ingaba animoyiki na
Kodwa iinkosi zabantu bakubo azanga zikholwe, zasuka zathi: “(UNûh) Akayonto yimbi ngaphandle kokuba ngumntu njengani, (koko) yena ufuna ukuzenza mkhulu kuni. Ukuba uAllâh Ebethandile, Ebeza kuthumela iingelosi. Asizanga khe siyive into enje koobawo mkhulu bethu bamandulo
Yena yindoda ethwaxwe yimpambano, khanikhe nimlinde ithutyana.”
UNûh wathi: “O Nkosi yam! Ndincede kuba bayandiphika mna.”
Ke kaloku Satyhila kuye (Sathi): “Yakha inqanawa phantsi kwaMehlo eThu naphantsi kwesityhilelo seThu, Usakufika umyalelo weThu ke ngoko namanzi sele edyudyuza kwioven, wothabatha, ungenise kuyo (inqanawa) uhlobo ngalunye (ezidalweni), inkunzi nemazi nosapho lwakho, ngaphandle kwabo ilizwi seliphumile ngokuchasene nabo. Kananjalo uze ungathethi naM ngabo benza ubugwenxa; inene bona baza kurhaxiswa ngamanzi
Usakuba ukhwele enqanaweni, wena nabo bakunye nawe, uze uthi: “Iindumiso zonke mazibe kuAllâh Osisindisileyo kubantu abenza ubugwenxa.”
Uthi kananjalo: “Nkosi yam! Ndenze ndizinze endaweni esikelelekileyo yokuzinza, kuba Wena UngoYena Ulungileyo kwabazinzisa emhlabeni.”
Inene kuko oku, kukho imiqondiso, Yaye inene Thina Siyazivavanya (izicaka zeThu)
Emva kwabo savelisa isizukulwana sabanye (abantu)
Ke kaloku Sathumela uMthunywa phakathi kwabo ophuma phakathi kwabo. Esithi: “Khonzani uAllâh; aninathixo wumbi ngaphandle kwaKhe; ingaba aniyi kuMoyika na?”
abahloniphekileyo phakathi kwabantu bakubo ababengakholwa, bephika indibano yakuBomi oBuzayo lo gama Sasibaphe ubutyebi kubomi basemhlabeni bathi: “Lo akayonto ngaphandle kokuba yindoda efanayo nani. Udla oko nikudlayo nani ukanti usela oko nikuselayo nani
Ke ngoko ukuba nikhe nathobela indoda efana nani, inene niya kuba ningabalahlekelwa
Ingaba unithembisa ngokuba nisakuba nifile sele niluthuli namathambo niza kubuyiswa (niphile kwakhona)
Kuxa iphi, kuxa iphi loo nto nithenjiswe ngayo (iMini yoMgwebo)
Akukho nto (injalo) ngaphandle kobomi bethu beli hlabathi! Siyafa, siphile! Yaye asizi kuvuswa
Kuphela yena yindoda eziqambele ubuxoki ngoAllâh, yaye asiyi kukholwa kuye thina.”
Wathi yena: “O Nkosi yam! Ndincede kuba bayandiphika mna.”
(UAllâh) Wathi: “Kungekudala baza kuzisola ngokuqinisekileyo.”
Ngoko ke isohlwayo sababamba ngenyaniso, Saza Sabenza bangathi yinkunkuma yezityalo. Ngoko ke kude lee nabantu abenza ubugwenxa
Emva kwabo Savelisa ezinye izizukulwana
Akukho Sizwe singadlulisela ixesha laso phambili kunexesha laso (esilibekelweyo) singekhe sililibazise nokulilibazisa
Ke kaloku Sathumela abathunywa beThu ngokulandelelana. Maxa onke kufika esizweni umThunywa waso babemphika, ke ngoko Sabenza ukuba balandelelane (kwintshabalalo), kananjalo Sabenza imbali. Ngoko ke kude lee nabantu abangakholwayo
Emva koko Sathumela uMûsâ nomntakwabo uHârûn, nemiqondiso yeThu negunya elicacileyo
kuFir’awn neenkosi zakhe, kodwa babekhukhumele bengabantu abanekratshi
Bathi: “Singakholelwa abantu ababini abafana nathi lo gama abantu bakubo bezizicaka eziphantsi kwethu?”
Babaphika ke ngoko baza baba ngabo batshatyalaliswayo
Inene Thina SamnikauMûsâisiBhalokhon’ukuzemhlawumbi bakhokeleleke (ngaso)
Kananjalo Senza (u’Isâ), unyana kaMaryam nomama wakhe baba ngumqondiso. Sabenzela umnquba okumhlaba ophakamileyo owenziwe wathi tyaba namanzi ampompozayo
Hini na nina baThuynywa, yidlani izinto ezilungileyo uAllâh Azenze zavumeleka (kuni), nenze izenzo ezilungileyo. Inene, Mna Ndiyakwazi enikwenzayo
Kananjalo le nkolo yenu, yinkolo enye, yaye Mna NdiyiNkosi yenu, Yoyikani Mna ke.”
Kodwa bona (abantu) bayahlulahlula inkolo yabo phakathi kwabo yaba ziimvaba ngeemvaba, imvaba nganye ivuyela oko inako
Bayeke ekudidekeni kwabo njalo okwexeshana
Ingaba bacinga ukuba oko Sibongezelele ngako ebutyebini nabantwana
Kungenxa yokuba Thina siyabangxamela (Sibantantazelele) ngezinto ezilungileyo? Eneneni bona abaqondi
Inene bona abo banoloyiko lweNkosi yabo
Nabo bakholwayo kwimiqondiso yeNkosi yabo
Nabo bangayamanisi mahlulelane eNkosini yabo
Nabo banikela ngoko banikela ngako, iintliziyo zabo zinoloyiko lokuba baza kubuyela eNkosini yabo
Ngabo ke abangxamayo ngezenzo ezilungileyo, yaye bayagqwesa kunabanye apho (ekwenzeni izenzo ezilungileyo)
Thina ke aSithwalisi (mthwalo) emntwini ngaphandle kwalowo anokumelana nawo ukanti kuThi kukho iNcwadi ethetha inyaniso; abayi kwenziwa bugwenxa
Kodwa iintliziyo zabo (abangakholwayo) zigqunywe kukudideka mayela nako oku, yaye banezenzo (ezingcolileyo) abazenzayo (ngaphaya kokungakholwa kwabo)
Side Sibahlasele abazizityebi phakathi kwabo ngesohlwayo, kuya kuba kanye bakhale (kuAllâh bekhalela) uncedo
(Kuya kuthiwa kubo): “Musani ukukhala namhlanje. Inene aniyi kuncedwa SiThi
IiVesi zaM zazisele zicengceleziwe kuni, kodwa nina nazifulathela nazizela ngezithende zenu
Nazikhukhumalela zona, nincokola ngobusuku, nithetha ukungcola
Ingaba abacamngcisisanga na ngelizwi (i’Kur’ân), okanye kufike kubo oko kungazanga kufike koyisemkhulu babo
Okanye babengamazi na uMthunywa? Ke ngoko bona ngokubhekiselele kuye abamamkeli
Okanye bathi: “Kukho impambano kuye? Nakanye, ukusuka apho yena wabazela nenyaniso, kodwa uninzi lwabo inyaniso luyichasile
Kodwa ukuba inyaniso ibinokungqamana neminqweno yabo, inene amazulu nomhlaba naye wonke ubani olapho ebeya konakala. Ukusuka apho Thina Sibazisele umyalezo wabo, kodwa bona bayawutshikilela umyalezo wabo
Okanye wena (Muhammad), ubabiza intlawulo na? Kodwa umvuzo weNkosi yakho nguwona ulungileyo, yaye Yena (uAllâh) nguYena Mniki ulungileyo kubaniki
Ke kaloku wena inene ubamemela eNdleleni ethe Tye
Kodwa inene abo bangakholwayo kuBomi oBuzayo balahlekile eNdleleni
Kananjalo enokuba beSinokubenzela iNceba Sibasusele oko kwakuphezu kwabo kusisohlwayo, bebeza kuthi gqolo ukugabadela, befathula ngobumfama
Ke kaloku Sibathe xhakamfu ngentlupheko (ukuba ibe sisilumkiso), kodwa abazanga bayigobele iNkosi yabo (uAllâh), bengazanga bazithoba nakuzithoba, bacele ngomthandazo, (baya kuhlala benjalo ke)
Side Sivule isango phambi kwabo lesohlwayo esibuhlungu, Yeha! Baya kuphoswa kuso benokuzisola okunzulu, bexhwalekile, bengenathemba
NguYe Onidalele ukuva nokubona neentliziyo (zokuqiqa); kuncinane eninombulelo ngako
NguYe Onandisileyoemhlabeniwonkeyayeniyakuqokelelwa phambi kwaKhe nonke
Kananjalo nguYe Onika ubomi Enze ukufa, ikwanguYe Ojika ubusuku bube yimini. Ingaba aniyi kuqonda ke
Nakanye, bona batsho izinto ezifana nezo zazisitshiwo ngabamandulo
Bona bathi: “Ingaba xa sele sifile, sele singumhlaba namathambo, siza kuphinda sivuswe ngenyaniso
Sakuthenjiswa oko thina noobawo mkhulu bethu ngaphambili; oku akuyonto ngaphandle kokuba ziintsomi zabantu bakudala”
Yithi: (Muhammad), “Ngokabani na umhlaba noko kuphakathi kuwo, ukuba nini abaziyo
Baza kuthi bona: “Ngoka-Allâh.” Yithi wena: “Ingaba ke ngoku aniyi kukhumbula?”
Yithi: “Ngubani iNkosi yamazulu asixhenxe noyiNkosi yeTrone eNkulu?”
Baza kuthi bona: “Zezika-Allâh.” Yithi wena: “Ingaba ke nina anizi kuMoyika uAllâh
Yithi: “Lukwesikabani iSandla ulongamelo lwezinto zonke inguYe nje Okhuselayo lo gama kungekho bani unokukhuselwa ngokuchasene naYe xa ngaba phofu niyazi?”
Baza kuthi bona: “Lukwesika-Allâh.” Yithi: “Ke ngoku nikhohliseke njani nina?”
Ukusuka apho Thina Sibazele nenyaniso, yaye inene bona ngamaxoki
UAllâh Akazelanga nyana, kungazanga kwabakho omnye uthixo okunye naYe Yena. (ukuba bekukho omnye uthixo kunye naYe) uthixo ngamnye ebeza kuthabatha okudalwe nguye, ukanti abanye kubo bebeza kufuna ukongamela abanye. Uzuko malube kuYe Yena Uphakamile koko bakubalela (kuYe)
(Yena) nguMazi wokungabonwayo nokubonwayo, ngoko ke Yena Uphakamele phezulu koko bakwayamanisa (naYe)
Yithi: “Nkosi yam ukuba Ungandibonisa oko bathejiswe ngako
Nkosi yam Ungandenzi ndibe kunye nabantu abenza ubugwenxa
Kananjalo inene, Thina Siyakwazi ukukubonisa oko Sibathembise ngako
Susa (ububi) ngokulungileyo, Thina Sizazi kakuhle izinto (ezingcolileyo) abazithethayo
Kananjalo yithi: “Nkosi yam! Ndifuna ukhuseleko ngaWe ekungcoleni kokusetyezwa ngamaShayâtîn (ooSathana)
Ndifuna ukhuseleko kananjalo ngaWe, Nkosi yam! Kuba hleze basondele kum
De ukufa kufikele omnye wabo (abo bayamanisa amahlulane kuAllâh), aze (aqale) athi: “Nkosi yam! Ndibuyisele emva (ebomini)
Khon’ukuze ndiye kwenza okulungileyo koko ndakushiya ngasemva!” Unotshe! Lilizwi nje elo alithethayo; kwaye emva kwabo (abafileyo) kukho iBharzarh (umsantsa) kude kube yiMini abaya kuvuswa ngayo
Ke kaloku lisakuvuthelwa iXilongo, akuyi kubakho kuzalana phakathi kwabo ngaloo Mini, bengayi kubuzana omnye ngomnye
Abo ke izenzo zabo (ezilungileyo) ziya kubanzima esikalini, ngabaphumeleleyo
Ke bona abo izenzo zabo ezilungileyo ziya kufumaniseka zilula, ngabo abaya kulahlekelwa yimiphefumlo yabo, esiHogweni kulapho baya kuhlala khona
UMlilo uya kubatshisa ubuso babo, babe zintlini-ntlini (ezitwezeke imilomo)
(Kuya kuthiwa kubo), “Azanga zicengcelezwe na iiVesi zaM kuni naza nina naziphika?”
Baya kuthi bona: “Nkosi yethu ukungcola kwethu kwasongamela, inene thina sasingabenzi bobugwenxa
Nkosi yethu Sikhuphe apha. Ukuba sikhe saphinda sabuyela (ekungcoleni), siya kuba ngokwenene singabenzi bobubi.”
UAllâh Uya kuthi: “Hlalani apho, nidelekile, ningathethi naM
Inene kwakukho iqela lezicaka zaM ezaye zathi: ‘Nkosi yethu, thina sikholiwe, sixolele ke ngoko ube nenceba kuthi, yaye Wena Ungoyena Unenceba kwabo banenceba.”
Kodwa nina nabathatha ngokubagculela nada nafikelela kwinqanaba lokuba banenze nilibale ngenkumbulo yaM, yaye nanidla ngokubahleka nina
Inene Mna Ndibabuyekezile naMhlanje ngokunyamezela kwabo: inene bona bangabona baphumeleleyo
Yena (uAllâh) Uya kuthi: “Mingaphi iminyaka enayihlala emhlabeni?”
Baya kuthi bona: “Sahlala imini enye okanye inxalenye yemini. Buza kwabo babhala phantsi (bagcina iziganeko)
Yena (uAllâh) Uya kuthi: “Anihlalanga, koko ibe ilixeshana elincinane, ukuba benisazi
Nanicinga ukuba Sanidalela imfeketho na [Singenanjongo, (nicinga)] nokuba anizi kuphinda nibuyiselwe kwakuThi?”
Ngoko ke makaphakanyiswe uAllâh, uKumkani wokwenyani: Akakho omnye uthixo ngaphandle kwaKhe, iNkosi yeTrone eNkulu
Nabani na ke obiza komnye uthixo ngaphandle koAllâh angenabungqina ngaye ityala lakhe lowo liseNkosini yakhe. Inene abangakholwayo abayi kuphumelela
Ke wena (Muhammad) yithi: “Nkosi yam, ndixolele Ube nenceba (kum), yaye Wena Ungoyena Unenceba kwabanenceba.”

Prev Next